कान्तिपुर फिल्म एकेडेमीले थिएटर पनि संचालनमा ल्याउने भएको छ। एक कार्यक्रमकाबीच अभिनेता राजेश हमालले कान्तिपुर थिएटरको शिलान्यास गरेका छन्। विगत ९ वर्षदेखी फिल्म निर्माण र अभिनय सम्बन्धी अध्ययन गराउँदै आइरहेको कान्तिपुर फिल्म एकेडेमीले गैह्रधारा नक्सालको आफ्नै एकेडेमी परिसरमा थिएटर सुरू गरेको हो ।
अभिनय पारखी र नाट्यकर्मीहरूको लागि थिएटर निर्माण गरेर रंगिन पर्दा र रंगमञ्चलाई सँगसँगै जोडेर लैजाने उद्धेश्यले कान्तिपुर थिएटरको सुरूवात गरिएको एकेडेमीका सिइओ प्रकाश पुरीले बताए। थिएटरको सुरूवातसँगै अब फिल्मका विद्यार्थीले कान्तिपुर फिल्म एकेडेमीमा थिएटर सम्बन्धी पनि अध्ययन र अभ्यास गर्न पाउने अवसर पाउनेछन ।
७५ फिल्ट लम्बाई, २९ फिट चौडाई र १६ फिट उचाईमा बन्न लागेको १४४ सिट क्षमताको यो थिएटर वैशाखभित्र निर्माण सम्पन्न हुनेछ।
एकेडेमीको अभिनय ब्याचका विद्यार्थीहरूका लागि थिएटर प्रोडक्सन र प्रदर्शनसँगै मञ्चनको लागि विभिन्न नाट्य समूह तथा रंगकर्मीहरूको लागि पनि मञ्च उपलब्ध गराउने साथै सुटिङ, अडिसन, स्क्रिनिङ, शोज र फिल्मसम्बन्धी अन्य गतिविधिको लागी पनि हल उपलब्ध गराउने एकेडेमीले जानकारी गराएको छ।
शिलान्यास कार्यक्रमका प्रमुख अतिथि राजेश हमालले कान्पितुर थिएटरको निर्माणसँगै नेपाली फिल्म र रंगमञ्चमा आउन र सिक्न खोज्ने नव–प्रवेशीहरूको लागि अवसरको दायरा फराकिलो भएको विश्वास व्यक्त गरे। कान्तिपुर फिल्म एकेडेमीले गतवर्ष कान्तिपुर सिनेमाज नामक ओटिटी प्लेटफर्मको पनि सुरूवात गरेको छ। यसमा फिल्म, सिरिज, सर्ट फिल्म, मिनी सिरिज र थिएटर प्ले पनि स्ट्रिमिङ भइरहेका छन्।
